හොඳම උපන්දින තෑග්ග සහ සයිබරය මඟ හැරීයාම

මේ මම කැම්පස් යන්න කලින් ලියන අන්තිම පෝස්ට් එක වේවි.

      පෙරේද මට ලියුමක් ආවා, කැම්පස් එකෙන් මට හොස්ටල් ලැබෙනව කියල.ආර්ථිකේ පැත්තෙන් නම් ඒක ලොකු හයියක් වුණාට මොකද ටිකක් විතර බයෙන් ඉන්නෙ රැග් එක සැරටම කන්න වෙයිද කියල.කොහෙද පිණිබිඳු අක්කත් මාව බය කලානෙ.

    හම්බෙච්ච හෝල් එක නම් අහන්න එපා.කියන්නෙ නම් නෑ.මොකද එහේදි පිසාගෙ පටි රෝල් වුණොත්.ඒත් ඕනකමක් තියේ නම් හොයාගන්න බැරි වෙන එකකුත් නෑ.

      ඉතින් දැන් මෙන්න මේ වචනෙ ලියනකොට මහ රෑ 1.01යි.ඒ කියන්නෙ අද ඉරිද.හෙට සඳුද.සඳුද මං පේරෙට වාර්ථා කරන්න ඕන, හොස්ටල් ගන්න.

අඟහරුවාදට තමයි නිලවශයෙන් උත්සවයක් තියල කැම්පස් පටන් ගන්නවයි කියන්නෙ.

  එතකොට අඟහරුවාද කියන්නෙ ඔක්තෝබර් 04 වෙනිද.

ඔක්තෝබර් 04 කියන්නෙ පිසාචයට හුඟක් වැදගත් දවසක්.වෙන මොකක්වත් නෙවෙයි පිසාචය මේ ලෝකෙට උපන්නෙ එදා වගේ දවසක තමයි

  ඒ කියන්නේ මට මගේ උපන්දිනේ දවසෙදි කවදාවත් අමතක නොවෙන උපන්දින තෑග්ගක් ලැබෙන්නයි යන්නේ.

මට හිතෙන විදියට මං ගොඩක් වාසනාවන්තයි.මං හීන මවපු කැම්පස් එකට මගේ උපන්දිනය දවසෙම ඉගෙනගන්න යන්න පුළුවන් වෙච්ච එක කොච්චර භාග්‍යක්ද කියල ඔයාලට තේරෙනව නේද....

එහෙම අවස්ථාවක් ලැබෙන්නෙ කීයෙන් කීදෙනාටද කියලයි...මං මේ කල්පනා කරන්නෙ.

       කැම්පස් එකෙ ඇතුලෙදි මට තව චාන්ස් එකක් තියෙනව.අපේ එවුන්ගෙන් අන්තිමට බර්ත් ඩේ පාටියක් දෙන්න වෙන්නෙ මට.මොකද කැම්පස් පටන් අරන් අවුරුද්දක් යනකම් මගේ එක එන්නෙ නෑනෙ.

( කට්ටිය මේ 04 වෙනිදටම මගෙන් පාටි ඉල්ලාවිද දන්නෙත් නෑ )

හරි ඒක ගැන එච්චරයි.

අද උදේ (01 වෙනිද ) අම්මගෙ ඔපරේශන් එක කලා.ප්‍රශ්නයක් නම් නෑ.ඒත් තව දවස් තුනක් විතර ඉස්පිරිතාලෙ ඉන්න වෙයි.මොනව කරන්නද.......

කලින් පෝස්ට් එකෙදි අම්මට ඉක්මන් සුවය ප්‍රාර්ථනා කරල කමෙන්ට් දාපු සහ ඒක කියවල හිතින් හරි එහෙම පතපු හැමෝටම ස්තූතියි.

හරි ඒකත් ඉවරයි.

දැන් කියන්න යන්නේ, මට ටික දවසක් යනකම් මේ පැත්තෙ එන්න බැරිවෙයි.එහේ ගිහින් නිවිහැනහිල්ලෙ පොස්ට් එකක් ලියන්න තියා කියවන්න හරි පුළුවන් දවසක් කවද එයිද කියල සින්නො තමයි දන්නේ.

ඉතින් ඒ දවස් ටිකේ මගේ යාළුවො හැමෝගෙම අළුත් ලිපි ටික මට මඟ ඇරේවි.ඒක ගැන නම් හුඟක් දුකයි.පුළුවන් වෙච්ච හැම වෙලාවකම මං ඇවිල්ල මොනව හරි කමෙන්ට් එකක් විදියට දාල යන්නම්.එහෙම බැරිවුණා කියල මාත් එක්ක තරහ වෙන්නවත්, අමතක කරන්නවත් එපා.මං පව්නෙ.....

දැන් නම් ටික ටික ඇස් පියවේගෙනයි එන්නෙ.ඒ කියන්නෙ මට දොයියන්න වෙලාව හරි.

එහෙනම් යාළුවනේ කැම්පස් එක ඇතුලෙදි ලියන පළවෙනි පෝස්ට් එකත් එක්ක ඉකමනින්ම ඔයාලව හම්බෙන්න එන්න ලැබෙයි කියන ප්‍රාර්ථනයත් එක්ක මං ඔයාලගෙන් දැනට සමුගන්නව.

(මේ පොස්ට් එකෙත් කම්න්ට් වලට උත්තර නැතිවුණොත් තරහවෙන්න එපා.වැඩ වැඩි නිසා තමයි එහෙම වුණොත් වෙන්නෙ.)

එහෙනම් හැමෝටම ආයුබෝවන්.....

පේරා.........මං එනෝ......!!!